సుజన సృజన

సుజన సృజన
ఓం నమో సాయి నాధాయ

21, మార్చి 2017, మంగళవారం

ఇది వసంత హేల .....




భూమీ తలమును  రంగుల
ఆమని ముంచెత్తె , చివురుటాకులెరుపులో
పామిన శ్యామలమయ్యెను ,
ఏమని వర్ణించ వచ్చు నీ వని  యమునన్ .

నిండుగా పూచి  పొగడ  వన్నియలు వోవ
దరిసి నాధుని కైసేయ దండ గ్రుచ్చి
మురిసి రాధిక మాధవుముందు నిల్చి
గుండెలకు గుండెలానించి దండ గూర్చె .

మోదుగ పూగుత్తిని గన
మాధవునికి రాధమీద మనసు దవిలి , బిం
బాధరి మోవికి వంశీ
మాధుర్యపు కేళి పంచి మరులొలికించెన్ .

బృందావనమున గోపీ
బృందముతో కృష్ణు డాడె , బింబాధరులున్
బందీలై మాధవునికి
సంధించిరి సరస మధుర  సరి సమరమ్ముల్ .

ఇది వసంత హేల , యిల కెన్నిరంగులో
ప్రకృతి కన్య పూచి పరవశించె ,
ఇందు బ్రతుకు మనిషి కెందుకో  ప్రకృతితో
పాలు పంచు కొనుట పడుట లేదు . 

4 కామెంట్‌లు:

  1. సీతారామశాస్త్రిగారి "ప్రకృతి కాంతకు ఎన్నెన్ని హొయలో - పదము కదిపితే ఎన్నెన్ని లయలో" పాటని గుర్తుచేసింది మీ ఈ పద్యమాల.

    రిప్లయితొలగించండి
    రిప్లయిలు
    1. లలిత గారిటు వచ్చిరి , లలిత లలిత
      వ్యాఖ్య బెట్టిరి , కడు ధన్యవాద మమ్మ !
      రాథికా శ్యాము డెంతటి రస హృదయుడు !
      వంశి మోహన రాగాల వరద పారె ,

      తొలగించండి
  2. మీరు రాసే ప్రతీ పదం
    రసరమ్య సుమధురం..
    చదివి పరవశించడమే తప్ప
    వ్యాఖ్యలిడలేను..
    ఇది నా చేతకాని తనం

    రిప్లయితొలగించండి
    రిప్లయిలు
    1. అప్పు డెప్పుడో ఒకపరి , అదియు నొక్క
      సారి ! మా సుజన సృజన పార జూచి
      నట్లు గుర్తు పద్మార్పిత , అహహ ! నేడు
      వ్యాఖ్య రాసిరి గూడాను , వాహ్ ! భలేగ .


      తొలగించండి